ពិធីបើកវគ្គបណ្តុះបណ្តាលស្តីពី «ជំនាញបច្ចេកទេសសារព័ត៌មាន»
ព្រឹកថ្ងៃចន្ទ ៩កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ខែឧសភា ឆ្នាំ២០២៦ ក្រសួងព័ត៌មានបានរៀបចំពិធីបើកវគ្គបណ្តុះបណ្តាលស្តីពី «ជំនាញបច្ចេកទេសសារព័ត៌មាន» នៅសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន ក្រោមអធិបតីភាពដ៏ខ្ពង់ខ្ពស់របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន។
វគ្គបណ្តុះបណ្តាលនេះមានគោលបំណងពង្រឹងសមត្ថភាពវិជ្ជាជីវៈរបស់អ្នកសារព័ត៌មាន មន្ត្រីព័ត៌មាន និងអ្នកពាក់ព័ន្ធ ឱ្យមានចំណេះដឹង ជំនាញបច្ចេកទេស ក្រមសីលធម៌ និងសមត្ថភាពអនុវត្តការងារជាក់ស្តែង ស្របតាមការវិវត្តនៃប្រព័ន្ធផ្សព្វផ្សាយឌីជីថល។
វគ្គនេះប្រព្រឹត្តទៅរយៈពេល ៥ថ្ងៃ ចាប់ពីថ្ងៃទី២៥ ដល់ថ្ងៃទី២៩ ខែឧសភា ឆ្នាំ២០២៦ ដោយមានសិក្ខាកាមចូលរួមសរុប ១០៩នាក់ មកពីអង្គភាពក្រោមឱវាទក្រសួងព័ត៌មាន មន្ទីរព័ត៌មានរាជធានី-ខេត្ត ស្ថាប័នពាក់ព័ន្ធ និងអ្នកសារព័ត៌មានដែលមានអាជ្ញាបណ្ណទទួលស្គាល់ដោយក្រសួងព័ត៌មាន។
មុខវិជ្ជាសំខាន់ៗក្នុងវគ្គនេះរួមមាន៖
-ការផលិតវីដេអូឯកសារ
-ការថតរូបភាព
-របៀបសម្ភាសន៍ អាន និងរាយការណ៍ព័ត៌មាន
-ការសរសេរព័ត៌មានកម្រិតបឋម និងការផលិតមាតិកា
សម្រាប់អនឡាញ និងប្រព័ន្ធផ្សព្វផ្សាយបែបថ្មី។
តាមរយៈវគ្គបណ្តុះបណ្តាលនេះ សិក្ខាកាមនឹងទទួលបានចំណេះដឹង និងជំនាញថ្មីៗ ដើម្បីអនុវត្តការងារប្រកបដោយប្រសិទ្ធភាព វិជ្ជាជីវៈ ទំនួលខុសត្រូវ និងចូលរួមលើកកម្ពស់ការផ្សព្វផ្សាយព័ត៌មានពិតជូនសាធារណជន។
ក្នុងឱកាសវគ្គបណ្តុះបណ្តាលនេះ ឯកឧត្តមរដ្ឋមន្ត្រីបានផ្តល់អនុសាសន៍ថា៖ អ្នកសារព័ត៌មានមិនគួរសរសេរព័ត៌មានដោយចម្លងតែខ្លឹមសារចេញពីអត្ថបទសុន្ទរកថារបស់ថ្នាក់ដឹកនាំទាំងស្រុងនោះទេ ប៉ុន្តែត្រូវចេះជ្រើសរើស ចាប់យក និងស្រង់សម្តីលើចំណុចសំខាន់ៗ ចំណុចថ្មីៗដែលមានតម្លៃជាព័ត៌មាន ព្រមទាំងចំណុចដែលមានប្រយោជន៍សម្រាប់សាធារណជន។
ឯកឧត្តមរដ្ឋមន្ត្រីក៏បានគូសបញ្ជាក់ផងដែរថា តម្លៃនៃព័ត៌មានស្ថិតនៅលើសមត្ថភាពរបស់អ្នកសារព័ត៌មាន ក្នុងការបកស្រាយបរិបទ និងរៀបចំខ្លឹមសារឱ្យមានភាពច្បាស់លាស់ ងាយយល់ និងមានសារប្រយោជន៍សម្រាប់អ្នកអាន ព្រមទាំងសង្គមជាតិ។
—————-
អត្ថបទ៖ សុភារ៉ា
រូបភាព៖ រតនា/ដេវីត
#ក្រសួងព័ត៌មាន #មន្ទីរព័ត៌មាន #បណ្តុះបណ្តាល #អប់រំ #វិស័យព័ត៌មាន