សម្តេចតេជោ ហ៊ុន សែន ផ្តល់ផ្ទះ១០២ខ្នង ជូនអតីតយុទ្ធជននៅខេត្តព្រះវិហារ
(ព្រះវិហារ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា សម្រេចផ្តល់ផ្ទះ១០២ខ្នង ជូនអតីតយុទ្ធជននៅក្នុងខេត្តព្រះវិហារ។ ការប្រកាសផ្តល់នេះ បានធ្វើឡើងក្នុងឱកាសសម្តេចតេជោ ជួបសំណេះសំណាលជាមួយប្រធានក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាក្នុងខេត្តព្រះវិហារ នាព្រឹកថ្ងៃសុក្រ ទី១០ ខែកក្កដា ឆ្នាំ២០២៦នេះ។
ក្នុងជំនួបនាព្រឹកថ្ងៃនេះ លោក គីម រិទ្ធី អភិបាលខេត្តព្រះវិហារ បានឡើងធ្វើរបាយការណ៍ពីស្ថានភាពរបស់អតីតយុទ្ធជននៅក្នុងខេត្ត ព្រមទាំងបានបង្ហាញពីការខ្វះខាតផ្ទះសម្រាប់អតីតយុទ្ធជនចំនួន១០២ខ្នងទៀត។
ក្រោយបានស្តាប់របាយការណ៍នេះ សម្តេចតេជោ ហ៊ុន សែន ក៏បានសម្រេចផ្តល់ផ្ទះចំនួន១០២ខ្នង ជូនដល់អតីតយុទ្ធជនដែលមិនទាន់បានផ្ទះនោះ។ ផ្ទះ១០២ខ្នងនេះ ជាការចូលរួមឧបត្ថម្ភពីសំណាក់សមាគមអតីតយុទ្ធជន និងនិវត្តជនចំនួន៥២ខ្នង ហើយលោក ភឿន ផល្លា ចំនួន៥០ខ្នង។
អតីតយុទ្ធជន សុទ្ធសឹងជាអ្នកមានគុណបំណាញ់យ៉ាងធំធេងសម្រាប់ជាតិមាតុភូមិ។ ក្នុងសកម្មភាពបុព្វហេតុជាតិពីអតីតកាល មានអតីតយុទ្ធជនធ្លាក់ខ្លួនពិការ ហើយត្រូវរស់ជាមួយពិការភាពរហូតដល់ពេលបច្ចុប្បន្ន។
តបស្នងនូវមហាគុណបំណាច់របស់អតីតយុទ្ធជន សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានយកចិត្តទុកដាក់ខ្ពស់ចំពោះជីវភាព និងការរស់នៅរបស់ពួកគាត់។ ដើម្បីលើកកម្ពស់ជីវភាព និងបង្កការរស់នៅឱ្យបានល្អប្រសើរសមនឹងអ្វីដែលជាការលះបង់របស់អតីតយុទ្ធជននោះ រាជរដ្ឋាភិបាល បានសម្រេចផ្តល់គោលនយោបាយជាដីធ្លីសម្រាប់បង្កបង្កើនផល និងធ្វើជាលំនៅឋាន។ បន្ថែមពីលើតាមរយៈសមាគមអតីតយុទ្ធជន និងនិវត្តជន បានកៀរគរសប្បុរសជនសាងសង់ផ្ទះជូនពួកគាត់ជាបន្តបន្ទាប់។
សូមបញ្ជាក់ថា ក្នុងកំលុងពេលចុះសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពតាមខេត្ត សម្តេចតេជោ ហ៊ុន សែន តែងតែក្រើនរំលឹកដល់អាជ្ញាធរឱ្យយកចិត្តទុកដាក់ទៅលើការរស់នៅរបស់អតីតយុទ្ធជន និងក្រុមគ្រួសាររបស់ពួកគាត់។ ជាពិសេសត្រូវគិតគូរពីការសិក្សារៀនសូត្ររបស់កូនចៅអតីតយុទ្ធជន។
សម្តេចតេជោ ក៏បានណែនាំឱ្យអាជ្ញាធរឱ្យរៀបចំកម្មវិធីពិសាអាហារប្រចាំឆ្នាំជូនអតីតយុទ្ធជន ឬអញ្ជើញគាត់ចូលរួមក្នុងកម្មវិធីនានាដែលខេត្តមាន៕