ពលរដ្ឋសំណូមពរដល់អាជ្ញាធរខណ្ឌដូនពេញ និងរាជធានីភ្នំពេញ ឱ្យចុះពិនិត្យទីតាំងហ្គេមបាញ់ត្រីក្នុងផ្សារទំនើបសូរិយា
(ភ្នំពេញ) ប្រជាពលរដ្ឋបានសម្ដែងការព្រួយបារម្ភ និងដាក់សំណូមពរយ៉ាងទទូចដល់អាជ្ញាធរមានសមត្ថកិច្ច ពាក់ព័ន្ធនឹងការបើកដំណើរការទីតាំងល្បែងស៊ីសង (ទូបាញ់ត្រី) ចំនួន ៥ទូ ដែលបង្កប់ក្នុងផ្សារសូរិយា ជាន់ខាងលើ ស្ថិតក្នុងខណ្ឌដូនពេញ រាជធានីភ្នំពេញ។
ប្រជាពលរដ្ឋបានដាក់ក្ដីសង្ឃឹម និងសំណូមពរផ្ទាល់ទៅកាន់ថ្នាក់ដឹកនាំ លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ និង ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ជាពិសេស ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ។
ពលរដ្ឋស្នើសុំឱ្យអាជ្ញាធរចុះត្រួតពិនិត្យ និងមានវិធានការលើទីតាំងខាងលើនេះ គឺក្នុងគោលបំណងពង្រឹងគោលនយោបាយ "ភូមិ ឃុំ សង្កាត់ មានសុវត្ថិភាព" ដើម្បីបញ្ចៀសបញ្ហាក្មេងទំនើង អំពើចោរកម្ម និងផលប៉ះពាល់ផ្សេងៗដល់សន្តិសុខសណ្ដាប់ធ្នាប់ក្នុងមូលដ្ឋាន។